O centro de saúde do Porriño será a primeiro lugar no que se implantará unha experiencia piloto para favorecer o tratamento citostático a pacientes oncolóxicos, evitando ter que desprazarse ao Hospital de Día do Álvaro Cunqueiro como é preciso agora. Esta experiencia ten como obxectivo comprobar se os circuítos establecidos para o seu funcionamento son os adecuados e valorar a participación dos pacientes. Confirmada a súa viabilidade, o proxecto estenderase a outros centros de saúde cabeceira de comarca dos municipios da Área Sanitaria de Vigo de maneira progresiva.
Carmen Albo, xefa do Servizo de Hematoloxía e Hemoterapia da Área Sanitaria de Vigo e coordinadora deste proxecto.
A doutora Carmen Albo, xefa do Servizo de Hematoloxía e Hemoterapia da Área Sanitaria de Vigo e coordinadora deste proxecto, explica que “trátase dunha iniciativa coa que pensamos imos favorecer o benestar do paciente e dos seus familiares, ao evitar as perdas de tempo e custos de desprazamento que leva achegarse ao Hospital de Día do Álvaro Cunqueiro. Así mesmo, secundariamente entendemos que se contribuirá a unha maior racionalización e optimización no emprego dos recursos actuais do propio Hospital de Día.” Nesta primeira experiencia, Identificáronse inicialmente 12 pacientes subsidiaros de recibir o seu tratamento de forma ambulatoria dos concellos de Mos, O Porriño e Salceda de Caselas, que iniciarán o seu tratamento no centro de saúde do Porriño a partir da mañá do martes 18 de febreiro.
O programa ofrecerase aos pacientes que requiran a administración de ciclos de tratamento tras o diagnóstico dunha enfermidade hematolóxica. Tras esta valoración completa do paciente no hospital e a administración do primeiro ou segundo ciclo no Hospital de Día sen presentar complicacións, valorarase a idoneidade de cada caso para cumprir coas características deste programa, ofrecéndoselle a posibilidade de continuar o seu tratamento de forma ambulatoria e preto ao seu domicilio.
A validación e preparación do seu tratamento levarase a cabo no Servizo de Farmacia do Hospital Álvaro Cunqueiro, coas mesmas medidas de seguridade que cando se administra o tratamento no propio Hospital de Día.
Finalmente, a administración deste tratamento realizarase por persoal de enfermaría do propio Servizo de Hematoloxía e Hemoterapia, formado especificamente na administración de citostáticos. Todo o proceso posibilita a súa administración coa mesma seguridade que no Hospital de Día.
Unha vez comprobados os resultados desta experiencia, avaliarase a súa implantación paulatina nos centros de saúde cabeceira de comarca da área sanitaria.
